Alvotech tilkynnir um verð og úthlutun hlutabréfa að andvirði um 152 milljónir dollara í útboði í Bandaríkjunum og lokuðu útboði til fagfjárfesta á Evrópska efnahagssvæðinu

REYKJAVÍK (16. júní 2026) -Alvotech (NASDAQ: ALVO, ALVO SDB) kynnti í dag ákvörðun um verð og úthlutun í áður boðuðu sölutryggðu hlutafjárútboði í Bandaríkjunum. Úthlutað var 22.666.667 almennum hlutum á verðinu 3,75 dollarar á hlut. Bréfin verða gefin út og seld af Alvotech. Gert er ráð fyrir að útboðinu ljúki 17. júní nk., að uppfylltum almennum skilyrðum. Félagið veitti jafnframt umsjónaraðilum útboðsins kauprétt til 30 daga að 3.400.000 bréfum á útboðsgenginu, að frádregnum afslætti vegna sölutryggingar og þóknana. Félagið gerir ráð fyrir að heildarafrakstur af útboðinu í Bandaríkjunum, áður en tillit er tekið til afsláttar og þóknana, verði 85 milljónir dollara (um 10,6 milljarðar króna) en allt að 98 milljónir dollara (um 12,2 milljarðar króna) ef kaupréttir umsjónaraðilanna verða nýttir að fullu.

Samhliða útboðinu hefur Alvotech gert áskriftarsamninga við tiltekna fjárfesta sem teljast fagfjárfestar eða viðurkenndir gagnaðilar á Evrópska efnahagssvæðinu (EES), í skilningi greinar 1(4) í reglugerð Evrópuþingsins og ráðsins 2017/1129. Alvotech mun gefa út og úthluta þessum fjárfestum 17.826.666 almenna hluti á verðinu 3,75 dollarar á hlut, því sama og í útboðinu í Bandaríkjunum. Heildarverðmæti viðskiptanna í lokaða útboðinu, áður en tillit er tekið til afsláttar og þóknana, er 67 milljónir dollara (um 8,4 milljarðar króna). Gert er ráð fyrir að þessum viðskiptum ljúki um 25. júní nk. Útboðið í Bandaríkjunum er ekki háð niðurstöðu þessa lokaða útboðs.

Gert er ráð fyrir að heildarandvirði hlutabréfanna í þessum útboðum verði um 152 milljónir dollara (tæpir 19 milljarðar króna) eða um 165 milljónir dollara (um 20,6 milljarðar króna) ef umsjónaraðilar útboðsins í Bandaríkjunum nýta sér kauprétt sinn að fullu, að undanskildum afslætti vegna sölutryggingar, þóknana og útboðskostnaðar.

Alvotech hyggst nýta afrakstur af sölu hlutabréfanna til þess að fjármagna þróun nýrra hliðstæðna líftæknilyfja, í veltufé og til að standa straum af rekstrarkostnaði, þar á meðal til þess að vernda lyfjahugvit félagsins, almennra rekstrarútgjalda, fjárfestinga í fastafjármunum, kaupa á búnaði, í samstarfsverkefnum, forklínískum og klínískum rannsóknum, við vöruþróun, undirbúning markaðssetningar nýrra lyfja og til endurgreiðslu skulda eða endurfjármögnunar.

Sameiginlegir umsjónaraðilar útboðsins í Bandaríkjunum eru fjárfestingarbankarnir BofA Securities, Jefferies og Evercore ISI.

Útboðið í Bandaríkjunum fór fram í samræmi við grunnskráningarlýsingu á eyðublaði F-3 sem upprunalega var lögð inn til Verðbréfaeftirlits Bandaríkjanna (SEC) 20. október 2023 og tók gildi 30. október sama ár. Við sölu bréfanna í þessu almenna útboði lagði félagið inn sérstakan viðauka við grunnskráninguna. Þessi skjöl eru aðgengileg á vef félagsins og á síðu SEC. Mikilvægar upplýsingar um sölu hlutabréfanna (e.Important Information) og fyrirvara er að finna í enskri útgáfu tilkynningarinnar.

Um AlvotechAlvotech, stofnað af Róberti Wessman, er líftæknifyrirtæki sem einbeitir sér að þróun og framleiðslu líftæknihliðstæðulyfja fyrir sjúklinga um allan heim. Alvotech stefnir að því að verða leiðandi fyrirtæki á sviði líftæknihliðstæðulyfja. Til að tryggja hámarksgæði eru allir þættir í þróun og framleiðslu í höndum fyrirtækisins. Alvotech framleiðir og markaðssetur fimm líftæknilyfjahliðstæður, hliðstæðu við Humira (adalimumab), Stelara (ustekinumab), Eylea (aflibercept), Simponi (golimumab) og Prolia/Xgeva (denosumab). Þá vinnur félagið að þróun líftæknilyfjahliðstæða sem m.a. geta nýst sjúklingum með sjálfsofnæmis-, augn- og öndunarfærasjúkdóma, blóðsjúkdóma eða krabbamein. Alvotech hefur gert samninga um sölu, markaðssetningu og dreifingu við samstarfsaðila á öllum helstu mörkuðum, í Bandaríkjunum, Evrópu, Japan, Kína, öðrum hlutum Asíu, Rómönsku-Ameríku, Afríku og Mið-Austurlöndum.

Frekari upplýsingar er að finna ávefsíðu Alvotech, áfjárfestasíðu okkarog áalmennri vefsíðu félagsins á ensku. Fylgjast má með starfsemi Alvotech áLinkedIn,Facebook,InstagramogYouTube.